قصص مغربية بالدارجة : قصة فوطوكوبي 2019 الجزء 1 الى الجزء 3

0 الجزء 1 

واحد سيد لله يرحمو كان قاليا بلي بنادم بحال لكارت ميموار كتكون خاويا فاش يلاه كتزاد محدك كتكبر وهيا كتعمر وداكشي لي كتعمر بيه هو لي مخليك نتا هو نتا ليوم كنعقل شي درس دلفلسفة كيدوي على هادشي يمكن هوية شخص لمهم كيما كنقولو حنا لمغاربة داكشي لي زرعتيه كتحصدو شافك ولدك كتشفر وتكدب راه غادي يولي يجيه داكشي عاادي إلا من رحم ربي كين لي من عند الله بعقلو ومربي.. كنعقل على يامات صغري غير بالكدوب لي كان فيا لعام تاني ليا فالإبتدائي وداك سؤال لي معمري عرفت لفائدة ديالو "شنو خدام لواليد ديالك" فاش سولاتني ديك الأستاذة كنعقل على داك سؤال بحالا غير لبارح حيت معارفش لواليد فاش خدام مني كنعقل عليه وهو فلحبس ومنقدرش نقولها ليها غيبدا كلشي يضحك دراري صغار هوما هادوك قلت ليها محامي معرفتش كيفاش خرجات ديك محامي من فمي يمكن حيت موصلاتنيش لواليدة لمدرسة داك نهار حيت كانت كتدوي مع لمحامي على ود لمعني بالأمر لي هو لواليد كنت كنشوفو مرة كل زوج سيمانات كان كيبركني حداه كيبقى عير يعنق فيا ويقوليا كبرتي ويسول فيا شنو داز فلوقت لي مشفتوش فيه وطبعا كيخرجوني من عندو غير بزز كان عزيز عليا ديال بصح هو أصلا من نوع لي كيبغوه دراري صغار بزربا زوين ضريف ضحوكي كيبان ليا غير مضلوم مستحيل داك سيد يدير شي حاجة تخليه يدخل لحبس لمهم كنت خربقتلك بنادم هالي كنقوليه محامي ها لي كنقوليه بوليسي ها شيفور دطاكسي ولكن لعام تالت ليا بدات كتقرى تما واحد لبجقولة مشعكة بنت جيرانا دارت ليا يوااااازع يااا ربااه على طريقة الكبار كلشي ولا عارف لواليد داخل لحبس تراه بنادم ولا كيخاف مني لبراءة زعما وداكشي لمهم هادشي والله ما كان معقدني لواليد كيباليا من أطيب خلق لله ومن زهرو لي كيهرس لحجر طاح فلحلاوة سطاج لخر دروجولة فنسا لواليدة معمري شفتها كتقول فيه شي كلمة خيبة فينما كنسولها أمتى غادي يخرج كتقوليا مورا لعيد جاي وعيد كيلوح عيد صافي وليت كنحشم نسولها.. غادي كتكبر وباغي تعرف شنو واقع علاش لواليد داخل لحبس شنو دار باش يبقى هاد لوقت كامل مكتقولش ليا, كتقولي فاش نمشيو عندو سولو عارفاني منقدرش نسولو لمهم هكذا كبرت مكنعمر مع حتى واحد فديك لعمارة ولا درب كندخل من قرايتي كنشد لكتوبا حدا لواليدة قاريا تاهيا عندها لباك وشي عام موراه مكملاتوش فيه تزوجات بلواليد لمهم كملت 15 عام فعيد ميلادي قالت ليا بلي لواليد مصيفط ليا كادو واحد لأيفون فعزو قلييل فين تشوف ديك تفاحة لواليد وخا فلحبس راه مخلي لواليدة فلوس عمرني بغيت شي حاجة وملقيتهاش و فينما نمشي عندو كيعطيني 100 درهم ديالي مورا ما ولا عندي تيليفون ولا ديما كيعيط ليا كندويو و كيسولني واش خاصاني شي حاجة وكدا وليت تنعاود ليه شنو واقع على برى وشنو كندير بتفاصيل.. عقلتو على ديك لمشعكة لي كانت عاودت لبنادم فالإبتدائي على لواليد ديالي هيا أول بنت تصاحبت معاها جاتني قريبة لدار وكنت كنعجبها هههههههه واااحد لوقيتا مقودة بنت ناس صغر مني وهيا لي خرجاتني طريق كتخلي لواليدة غير تا تخرج من دار وكتبدا تدق هيا, واحد نهار عمرو يتنسالي كيف خرجات لواليدة صونيتلها وهيا تجي دقات حليت ليها يلاه داخلين لبيت كيبانو ليا سوارت د دار نساتهم لواليدة ومعاهم بزطامها عرفتها غادي ترجع على ودهم غادي نقول لديك بنت ناس تخرج قبل ما ترجع لواليدة حتى كنسمع دقان لواليدة كتقوليا يوسف حل لباب راه نسيت سوارتي علاش ساد من لداخل عرفتي وليت كنحس بقلبي كيضرب بحالا شادو فيدي أنا لواليدة كتشوفني بحال شي ملاك طيارة لبيت غير قلت ليها لواليدة رجعات لبنت لون وجها تبدل هزيت ناموسية دخلات تحتها وخرجت حليت للواليدة قبل متهرس لباب كتسول فيا فين كنت باش هبطت عينيا كتباليا صندالا ديال ديك لبنت محطوطة تما باش دارت لواليدة تسد لباب طرت أنا على ديك صندالا ضربتها تحت سداري لواليدة كتباليا بدلات جلابتها ببيجاما ديال دار قالت ليا حتال غدا عاد غنمشي وااحد لحصلة ديال لكلاب لبنت بقات تما تال لوقيتا ديال لغدا دخلت ليها شويا فلخبز هههههههه آححح على داك نهار وصافي دارهم مخلاو حتى بلاصة كيقلبو عليها وهيا تحت سرير فبيتي بقات تما حتى نعسات لواليدة مع 4 دلعشيا عاد خرجتها ملي محصلتش داك نهار عمرني نحصل (mission impossible) صافي دخلت لبيت بقيت كنضحك غير بوحدي موراها درت عقلي مبقيتش كنتلاقا معاها فدار كنتلاقاو على برى😇.. نهار لي غادي يتبدل فيه كلشي كنت بارك فبيتي طالق لمزيكا ديالي و كنوجد للجهوي لإمتحانات قربو لواليدة داك نهار خرجات صباح بكرييي فاش رجعات لقاتني كنحفظ قالت ليا نوض تصخر جيب واحد درهم دلخرقوم مفيا مينوض قلت ليها عندي لحفاظا لحانوة راه غير لتحت سيري نتي أنا خليني للمهام صعبة شي حاجة تقيلة.. بقات لاصقاني تا وقفت خديت من عندها فلوس غادي خارج وهيا تابعاني سولتها مالك قالت ليا والو غير نسد لباب موراك بقيت تنشوف فيها هادي مالها لباب نقدر نسدو فيدي وانا خارج حليت لباب تا كنلقا لواليد واقف قدام لباب شمنك يا دموع وتنخصيص فاش كان فلحبس ومكنتش كنبكي عليه هكداك ولكن دموع ديال لفرحة راه معمري شفتو على برى تال داك نهار كنسولو واش بصح خارج و واقف معايا ولا غير كنحلم قاليا مكتحلمش أنا رجعت.. قدي قداش وهازني من الأرض دخلنا لدار كنشوف سيد عينيه مغرغرين هو براسو ممتيقش بلي رجع لدارو..

حياتي كلها كان كيحسابلي بلي صافي راه لواليد يخرج من لحبس غتكون هيا نهاية سعيدة دلقصة فاش خرج عرفت بلي حياتنا عاد غادي تبدا داك نهار لي خرج فيه هو من لحبس.. كيفاش غتنسى داك نهار لي تبلات فيه حياتك من دقيقة لي شفتو فيها برى كلشي تبدل بقينا غير باركين فدار تيعاود لينا فين غادين نسافرو قال للواليدة تشهيت كسكسو طيبيه أنا غنخرج واحد نص ساعة ونرجع.. قلت ليه صبر نمشي معاك قاليا لا ماشي ليوم دبا نخرجو مع بعضياتنا حتى متبقاش حاملني خلاني بارك تما وخرج مقالش لينا فين غادي خارج صخراتني لواليدة نجيب سميد وشي سخرة غادي بالفرحات عليا أول مرة نتغدا مع لواليد راه شي حااجة فشكل حطيت ليها تقديتها زدت فلمزيكا وشاد كتوبتي حتى كتدخل عليا لواليدة تاني كتقوليا نوض يلاه معايا باك دار كسيدة أنا كيحسابلي مطلعينها عليا تاني وهيا تم خارجا بيجامتها وصندالة ديال لحمام مفهمت والو ولكن من وجهها باين بلي مكتضحكش هاد لمرة هزيت ليها جلابتها وتبعتها مفاهم والو لواليد راه نهارو هدا ميمكنش توقع ليه شي حاجة..(يتبع)

الجزء 2

ملاحضتوش بلي معرفتش براسي ماشي حيت نسيت لا لا أصلا هادشي لي كندير هنا كنعاود ليكم على راسي تال دبا راكم عارفين سميتي وكيفاش دوزت صغري خليناها فنهار لي خرج فيه لواليد من لحبس قلت ليكم بلي دخلات عليا لواليدة مورا ما خرج هو كتقوليا بلي دار كسيدة وخرجات كتجي مقالتش ليا فين ولا كيف داير بقيت تابعها بحوايجها وبزطامها والله ما قديت نلحق عليها فطريق سيدة حياتي كلها وهيا كتسناه يخرج ونهار يخرج توقع ليه شي حاجة أنا فبلاصتها نتسطى.. لمهم فاش وصلنا لبلاصة لي دار فيها كسيدة ملقيناهش هزاتو لإسعاف لصبيطار بنادم لي واقف تما شي كيقول داوه ميت شي كيقول حي غير زادو رونونا ديال بصح وخا الله لي عالم بيا ولكن كندير لواليدة عقلها لبسي حوايجك ومغيكون غير لخير.. مشينا لداك صبيطار غير وصلنا قالت ليا منقدرش ندخل سير نتا سول وقوليا بقيت كنجر فيها واش هاد طريق كاملا وتقولي ليا منقدرش واش عندنا لوقت ديال لعب دراري صغار دبا.. مقداتش تدخل دخلت أنا تنسول تما واحد لفرملي ضريف قاليا كيجيك شي حاجة قلت ليه بابا مع لعلم حياتي كلها كنقول ليه غا لواليد ديك بابا معرفتش منين خرجات قاليا تسناني هنا غندخل نجيب ليك لخبار باش ترتاح وبصح بقيت واقف تما حتى خرج قاليا واش لواليد ديال طويل شويا دلحية وبيض.. جاوبتو اه هو هداك قاليا معندك مناش تخاف عليه راه خليتو داوي مع طبيب جيبو ليه حوايج باش يبدل لي لابس تقطعو و.. مخليتوش يكمل تا هضرتو خرجت عند لواليدة صافي نوضي دخلي ورخفي فك نفس راه بيخير أنا غنمشي نجيب ليه حوايج باش يبدل بقاي نتي معاه قالت ليا لله يرضي عليك ودخلات غادي لدار بجري معمرو يتنسالي داك نهار كنخيط فدروبا غنكون حطمت شي رقم قياسي وصلت لدار عاد عرفت بلي خلينا لباب ممسورتش كون جا شي واحد غير دفعو يتحل ولكن هانية كلشي دايز لمهم لواليد موقع ليه والو كنقلب على صاك لي جاب معاه ندي ليه حوايج منو ملقيتش صاك فصالون فين كان بارك بقيت كنرون فلبيت ديال نعاس حتى لقيتو تحت سرير حليتو مفيهش حوايج فيه فلوس بحالا ضربني ضو أنا معرفت باش تبليت سديتو رجعتو لبلاصتو دخلت لبيتي هزيت واحد تيشيرت كبير عليا وسروال ديال لجينز يقدر يجي قدو هو عملاق عليا غادي خارج وهو يقرصني شيطان قاليا دوك لفلوس فين تباان 200 درهم وسطهم خودها راك محتاجها.. مقدرتش نقاوم دخلت خديت 200 مبانتش وأصلا لفلوس مبقاتش فيها لبركة كتصرف 200 درهم بحالا صرفتي غير 20 جريت واحد زرقة أخرى تا بغيت نسد صاك يدي كالتني تاني وليت واحد 1000 درهم خبيتها فبيتي عاد خرجت سورت لباب وبقيت كنتأكد منو كان غيركبني لوسواس لقهري.. مشيت لعندهم لقيتو بارك مع لوالدة مضروب فكتفو و راسو ولكن ماشي شي حااجة قاليا منين جبتي هاد لحوايج حسيت بيه باغي غير يعرفني واش شفت صاك ولا لا قلت ليه ملقيتش صاكك جبتلك هادو من عندي وهو يرتاااح عاونتو بدل حوايجو وخارجين قالت ليه لواليدة حڭا شنو درتي مع لي ضربك قاليها والو سيدة شيبانية قد مي ولغلط مني أصلا موقع والو سيد نفرشخ بحالا داخل فيه تران وكيقوليك والو.. شدينا طاكسي لدار لواليدة مشات كتقاد فلغدا تاني وبقيت أنا بارك معاه داوين كيسول فيا كيغادي مع الإمتحانات وكدا بقيت داير ليه خاطرو فالهضرة ندمت تا هزيت دوك لفلوس أصلا مخاصني والو وإلا عاق بيا غادي نطييح من عينو ديال بصح ولكن ديك ساعة صاافي لي عطاه الله عطاه منقدرش نرجعهم.. تغدينا جبت ليه شي دوا كاتبو ليه طبيب بدا بنادم كيجي عندنا على كيقولو ليه على سلامتك معرفتش واش على خروجو من لحبس ولا لكسيدة لمهم دار عمراات ديال بصح غير لعائلة ديال لواليدة خوت لواليد معمرهم مشاو شافوه مغاديش يقدرو يجيو يشوفوه دبا مجاتش.. فديك ليوماين بقى كيلبس ليا حوايجي وخا كيجوه صغار قالينا بلي حوايجو فرقهم على عشرانو تما مشيت معاه يتقدا خدا داكشي لي باغي سولني واش خاصاني شي حاجة قلت ليه لا وهو يمدلي 200 درهم قاليا هادي إلا بغيتي شي حاجة أنبني ضمير ديك ساعة والله رجعت لدار حطيتها مع خواتاتها ولاد لعبد ولاو عاطينها غير لتسركيل بزوج لواليدة ولات تصبغ شعر وتطلقو سابت سابت ولاو كيغنيو ليا فلكوزينة مربي زويجة ديال سطيلة عندي فدار وصافي يضرك خاطرك وشنو كيغنيييووك الأغاني ديال ناس لحساسين طرب ولملحون وراي عدوك متبغيش ليه ديك لعيشة بحالا مكينش معاهم أنا ولكن هانية خليهم يعيشو تال واحد لعشيا بارك معاهم وهيا تقوليه عقلتي على واحد لأغنية كنتي ديما كتغنيها يامات لافاك؟ أنا بارك وسطهم وكندور راسي غا كنشوف فيهم كنحس براسي داخل لشي فيلم هندي عايش مع شاب خالد وديانا حداد وابزاااف مرضوني كون غير شي صوت زوين لواليد راه يقول سلام لليهودي يسلم.. أنا باغيها كنت كنتسناها غير تدخل معاه لمعقول تسولو منين كان كيجيب لفلوس بلاش.. واحد لوقيتا وليت كنقول كون غير بقى فلحبس سيد ولا حاضي معايا بحالا فعمري 4 سنين خاصو يعرفني فين خارج معامن كنوقف فاش كنتفرج زعما زيار باش منخرجش طريق ولا منعرف أنا غا كنجمع ليه حتال واحد صباح فقت مبجقل لقيتو كيوجد مع لواليدة لفطور وكيغني ليها ديدي بلا حشمة بلا حيا صافي النقطة التي أفاضت الكأس قلت ليه وي لواليد راك لواليد ولكن لواليدة فوتها عليك باش نبقاو زوينين أنا كلشي نقلبو إلا قلة لحيا ولحترام تبغي نتا لي يدير هادشي مع مك بقاو غا كيشوفو يلاه فايق ومشابعش نعاس مفهمو تاشي حاجة قاليا شنو كتخربق تما قلت ليه صباح نور ودخلت نغسل وجهي فطرت وتحركت لليسي أخر نهار ليا فيه دوزتو ورجعت لدار كنسمع غواتهم من دروج دلعمارة خلعوني راه خليتهم سمن وعسل وكيكملو هضرة بعضياتهم حليت لباب وهيا تجرني لواليدة من قبيتي قالت ليا وآاااااااجي تشوف أولدي رجال ولي يدير فيهم تيقة جايا 17 عام وأنا كنتسناه كلشي كيقوليا تطلقي وتزوجي بمن غيرو سيييد سيدو وأنا كي لهبيلة كنتسنا فاش خرج سيمانة قالك باغي يتزوج يجيب عليا ضرة دبا هدا ماشي ولد لق***.. صدماتني حبست ضحكة غير بزز كنشوف فيه واش هاد لهضرة بصح قاليا وا شرع عطا ربعة! فلول كيحساب ليا واش غي كيضحكو معايا تاني حتى لاحت ليه لواليدة صاكو من شرجم قالت ليه تبع حوايجك أنا بدون شعور طيااااارة لدروج صاك لي فيه فلوس وصلت كيف هزيتو لقيت لواليد واقف ورايا بقا كيشوووف بحالا حس بيا عارف شنو كين فداك صاك قاليا أراه وطلع لداركم مديتو ليه وطلعت لدار معرفتوش فين مشا..(يتبع)

الجزء 3

معمرني سمعت لواليدة كتخصر لهضرة تال داك نهار طلعت لدار سيد مشا وهيا مزال كتسب فيه كتسكت شويا تا كتقول ديك أويلي ياويلي على ولد ل*** أنا غير كنضحك وخا قودتها مع لواليد حتى أنا غير باليا صاك خرج من شرجم معقلتش على راسي تا نزلت هزيتو سبقت مولاه دبا غادي يعرفني هزيت ليه منهم هو راه ميدير معايا واالو ولكن ديك طيحة لي غنطيح ليه من عينو هيا لي محملتش.. لمهم كنسول لواليدة شنو وقع أنا خرجت خليتكم كتغنيو وسيمانة كلها كنسمع غير طرب ولملحون حتى قلبتوها صباط تخلعت أنا..

قالت ليا بحالي بحالك باركين ضاحكين واكلين تا قالك باغي يتزوج هادي امتى عرفها بعدا ياك هاد سيمانة مخرجش بوحدو دبا هدا ماشي ديال ندخل عليه أنا لحبس.. بقيت غير كنبرد فيها داك نهار لواليد صدمها صدمة مقودة كاع متبغيهاش لعدوك.. رجعنا لوقيتا قبل ما يتزوج غير دبا معارفينوش فين كاين سمعت لواليدة كتدوي معاه فتيليفون غادين يتطلقو أخر حاجة كنت كنتسناها هيا هادي ولكن لعيب من لواليد مدار فيها ميصلاح معمرو يلقا شي وحدة تسناه حتى عامين مقادين لواليدة تسناتو 17 عام معمر شي واحد شاف عليها شي حاجة خيبة..

دازت وقيتااا تا بقاو يوماين لرمضان عاد عيط ليا فتيليفوني قاليا توحشتك بغيت نشوفك قبل رمضان قلت ليه وخا دار راك عارفها؟ قاليا لا راك عارف منقدرش نجي لتما خرج لعندي نتا نهزك من راس درب غدا مع ل11 متقولهاش ليها. كيف قطع قلتها لواليدة سولتها واش نمشي ولا لا قالت ليا سير إلا بغيتي تشوفو ولكن رجع بكري..  داكشي لي درت لغد ليه خرجت لعندو فديك لوقيتا لي درنا غنتلاقاو فيها وقفت فراس ديال درب بقيت كنتسنا مجاش ضربات 12 ونص وسيد مكيناش ريحتو كنصوني ليه مكيجاوبش حقدت ديال بصح أصلا عندي ميدار حفاظا ورمضان لغدليه خاصني نمشي لحمام وكدا..

 رجعت لدار شافتني لواليدة راجع كاعي سولاتني مالك قلت ليها شنو كين وهيا تبقى تعمر فيا عليه وخا كلامعها تقريبا كلو بصح مشيت لحمام رجعت لدار تغديت عاونت لواليدة كتوجد شي لعيبات لرمضان عاد عيط ليا جاوبتو بزوج كلمات واش من نيتك مخليني كنتشمش ساعتين متعيطش ليا وا خسر عليا غير مساج قوليا غير رجع لداركم, بدا عليا بديك لهضرة ديال مساليتش والله غالب قلت ليه ماشي غير ليوم نتا أصلا معرفتش مالك دير فبالك بلي إلا رجعتي لحبس مكينش لي غادي يطل عليك سيدة لي موالفا تجي لعندك هايا حلفات عليك بقيت داوي معاه أنا كنخاصم عليه وكندير ليه عقلو قاليا شوف نزل لتحت أنا قدام لباب ديال لعمارة قطعت ونزلت كيباليا واقف بواحد طوموبيل ومعاه شي وحدة قاليا طلع طلعت قالت ليا سلام جاوبتها ب وعليكم وسكت تحرك بينا قلت ليه راه مباغيش نتعطل لواليدة بوحدها وغدا رمضان وهيا تدور عندي سيدة قالت ليا صبر أولدي غير نبركو فشي بلاصة وندويو ونعرفك.. سيدة غتكون كبر من لواليدة بشي 10 سنين وضاربا تيشورت بيض وسروال دلجينز وزعرا زعوريا ديال سيدي ربي مقدرتش نقول لا جبدت تيليفون عيطت لواليدة قلت ليها راه معاه واحد ساعة وغادي نرجع..

وقف قدام واحد ريسطورا مقاودااا دخلنا لجريدة معرفتوش فين مشا بقيت مع ديك سيدة مقديتش نشوف ليها فعينيها مكانش يحسابلي كنحشم لهاد درجة أنا صدمتني ولكن بنت لعبد مقااااودا ومهلياا فراسها كتسول فيا كي غادي مع لقراية.. كتسول و تنجاوبها تا قالت ليا واش غتصوم هاد لعام باغا تضحك معايا قلت ليها دبا واش لي خلا سيدة لي تسنانو 17 عام مغاديش يدير ليك بحالها ولا كتر؟ بدات كتضحك مدواتش جا بركنا وبدا داوي قاليا بعد على صداع كمل قرايتك وشوف ليك شي خدمة زوينة ان شاء الله وتحمرلي وجهي لي حتاجيتيها غادي تلقاها وحتى لواليدة ديالك مبغيتكش تاخد عليا شي فكرة خايبة أنا راه أي حاجة درتها فحياتي راه درتها على ودكم يمكن جا لوقت لي نفكر فيه شويا فراسي تا أنا..

بقيت غير كنشوف فيه واش منيتو كيدوي هاد خونا.. يلاه جاب سرباي لعشا قلت ليهم بصحة أنا غنمشي بقاو كيحلفو عليا واالو غنمشي هيا غنمشي قاليا صبر نوصلك قلت ليه دار مبعيداش بزاف وباغي نتمشا شويا غير تعشاو نتوما وهو يقول لديك خيتي لي معاه واش عندك شي 100 درهم تما محملتووووش دياال بصح خليتها كتحل فصاكها وخرجت بقيت كنتمشا بشويا لدار طلعت لقيت لواليدة كتسنا فيا باش نتعشاو بزوج يخيروني مبين لواليدة ولواليد غادي نعزل لواليدة بلاما نفكر معرفتش واش حيت هيا لي كنعقل عليها وصلاتني لمدرسة وسهرات معايا فاش كنت مريض وفاش كنت كنحفظ وكلشي فيها راجل ولمرا وكلشي وفنفس لوقت حنينا ورجولة.. لمهم كنتعشاو وكتسول فيا كيدايرا هاد خيتي وشنو قالو ليك وفين مشيتو..

 لمهم داك رمضان داز فشكل لواليد ولواليدة تطلقو وخا مبغاش وبقا كيطلب فيها هيا مدخلاتش ليها لراسها يزيد عليها ضرة لمهم بقا ديما كيعيط ليا كيسولني واش خاصني شي حاجة وتيقوليا باش ندير شي يوماين ندوزهم معاه كل مرة كندير سبة غنمشي عندو غيبقى يسولني على لواليدة وفاش انرجع لعندها تاهيا غتبقى تحقق معايا اللهم بلاش داك رمضان مكين غير صلاة فوقتها وخليت لحية لواليدة غ كدور وتقوليا حيدها وليتي فوطوكوبي ديال باك..

داك لعام لمشاكل وصداع فلوقيتا ديال لإمتحان و ضارب 16 فلجهوي صدمتهم لا لواليدة لا لواليد قاليا لي بغيتيها ناخدهالك قلت ليه غير رتاح مباغي والو كلشي عندي دبا لبلان هو كيبغي بحالا يعيق على لواليدة بفلوس عارفها معندهاش لمهم داك صيف بديت كنوجد للباك باغي نفركعو بشي نقطة مضايراش باش منزيدش موراه شي حاجة.. مرة مرة كنمشي مع لواليدة لبحر لواليد كان مسافر مع مراتو بغاني نمشي معاهم ولكن مقدرتش.. صراحة تقال مراتو زوينة دراري ديال (stepmom) إستغفروا ربكم..(يتبع)